Home Page

Communalism Combat

IRW Archive

Khoj

Aman


Carnage in Gujarat: Citizens’ Initiative for Justice & Peace
Update:  March 1, 2002

Ram Mandir

 

Ke Jis Mandir Ka Gara Khoon Men Goondha Gaya Ho
 

Ke Jis Ki Saree Eeten,
 

Bastiyon Men Aag Sulga Kar

 

Pakaee Ja Rahee Hon

 

Ke Jis Ki Ghantiyon Men

 

Siskiyan, Aah-O-Buka, Cheekhen

 

Piroee Ja Rahi Hon

 

Ke Jis Mandir Ke Bunyaaden,

 

Watan Ki Sab Jadon Ko Khod Kar Tameer Ki Janyen

 

Ke Jis Ke Rang-O-Raughan Ko

 

Hazaron Aurtoon Ki Mang Ke Sindoor Ki

 

Wahshi Zaroorat Ho

 

Ke Jis Ke Patharon Men

 

Naqsh Jab Ubhren, To Yun Ubhren

 

Nazar Aaye

 

Kisi Masoom Ki Bindee

 

Kisi Majboor Ki Aahen

 

Kisi Burhe Ki Ummeeden

 

Kisi Kamsin Jawani Ki

 

Sisakti Aakhri Sansen

 

Use ‘Maryada Purshottam Ka Mandir’

 

Nam Dena Pap Hoga

 

Karo Tum Pap

 

Karte Hi Rahe Ho

 

Magar Mujh Se To Ye Hargiz Na Ho Ga

 

Men Us Ko ‘Ram Ka Mandir’ Naheen Keh Paoon Ga Hargiz.

 

Naheen Keh Paoon Ga Hargiz.

 

Naheen Keh Paoon Ga Hargiz.

 

 

GAUHAR RAZA

01.03.02

TOP

Home Page

Communalism Combat

IRW Archieve

Khoj

Aman